 ავღანეთში, მარჯაში მიმდინარე ნატო-ს ოპერაციის შესახებ აქვეყნებს სტატიას "The Washington Post”.სამხრეთ ავღანეთში კოალიციის ყველაზე მასშტაბური ოპერაციის მეექვსე დღე ყველაზე ტრაგიკული აღმოჩნდა. დაბომბვის შედეგად ნატო-ს ოთხი სამხედრო მოსამსახურე დაიღუპა. ოთხიდან სამი სამხედრო ბომბის აფეთქებას ემსხვერპლა, ხოლო მეოთხე კი მოწინააღმდეგის მხრიდან გახსნილ ცეცხლს. მარჯას ოპერაციაში სულ ნატო-ს ცხრა და ავღანეთის ერთი სამხედრო მოსამსახურე დაიღუპა. ნატო-ს არ გამოუქვეყნებია დაღუპულთა ეროვნება, თუმცა ცნობილია, რომ გარდაცვლილთა შორისაა ერთი ბრიტანელი სამხედრო მოსამსახურე. მარჯაში შეტევის დაწყებიდან კოალიციის ჯარებს არარეგულარული ცეცხლის გარდა გზაზე ჩამონტაჟებულ ბომბებთანაც უწევთ გამკლავება, რომელთა აღმოჩენა დღემდე ძირითადად დროულად ხდებოდა. ამერიკელი საზღვაო ქვეითებისა და ავღანელი სამხედროების მიერ ცენტრალური გზების, ხიდებისა და სამთავრობო ცენტრის დაკავების შემდეგ თალიბების მხრიდან წინააღმდეგობა შემცირების ნაცვლად კიდევ უფრო გაიზარდა. სამხრეთ ავღანეთში უმაღლესი სამხედრო მეთაურის, ბრიტანელი გენერალ-მაიორ ნიკ კარტერის განცხადებით, ოპერაციამ "დასაწყისის დასასრულს” მიაღწია. მისი თქმით, საბოლოო შედეგის მისაღებად კიდევ ერთ თვეა საჭირო.
|
